Vuoi, vuoi mu

Vuoi vuoi dan supersámenieidda! Ii lean gusto nu máilmmi čeahppi lášmmohallat. Muhto ii dat gánnát doložiid smiehttat. Dál čohkkán dás, ja gieđat nu doarggistit! Lean geanehuvvan go in leat daid maŋimuš mánuid lovttohallan. In nagodan loktet nu bures go giđđat nagodin. Muhto in áiggu láitit. Dál lean jođus. Aŋkke odne!

Maŋimuš vahku lean máŋgii fitnan beatnagiin vázzimin, guktii fitnan Tjelbergtindas, ja dál, bearjadateahkeda lean fitnan lovttohallamin ruvddiid lášmmohallanguovddážis!

Otná lášmmohallan:

Suhkan: sullii 10 minuvtta

Benkpress: 20kg*12*1, 24*8*2, 26,5*6*1

Franskpress: dušše staggu*9*1, +2,5 kg*8*3

Skråbenk hantler: 8kg*8*2, 10*3*1, 8*6*1

Viehka várddus, die oidno Kabelvåg.

Okta beasai veahá ruohtadit, ja nu lihkulaš ieš.

Viimmat vázzán

Ikte čuvvon guoimmi go manai bargui, ja vázzen beatnagiin ruovttoluotta ruoktut. Lea unna tunneallaš dan gaskkas, muhto mun in orrun hálideamen dan sevdnjes tunnellii. Nu ahte mun dat gal baicce mannen tunnealla badjel! Lei beaivvádat, deiven measta máđii'ráje, ja bessen vel govvidit gávpogačča gos moai orru. Dainna gal ledjen hui duđavaš! 

Fallut, sávrut, gievrut, ruoidnat, movttáskit - mihtut

Ledjen meastá vuolláneamen. Muhto de fáhkkestaga nagodin fas! Ikte fas lášmmohallen! Gal dál lei okta áigi fas lihkadit, dása lean oalát šlieddan. Ledjen jáhkkán go bloggegohten ahte dán dáhtonii gal lean jo fallun, sávrun, givrun, ruoidnan, movttáskan, jna jna. Muhto, in gusto. Girjás eallin.

Oisann!

Dál de. De lean álgán ođđa bargui, ja hárjánišgoahtán dasa, nu ahte ammal dál gal joavddan lášmmohallanguovddážii fas fargga! In leat albma láhkái hárjehallan guhkes áigái. Lean dušše fitnan veahá viehkamin ja vázzimin, ja veahá lovttohallan deattuid ruovttus. Mus leat juolggit veahá vearkán, muhto lohken neahtas ahte in galgga vuollánit dan dihte. Muhto baicce joatkit, ja muitit fanahallat. Joavddan go son ihttin lášmmohallanguovddážii, speanta!

Ná ledjen eske čiŋadan ovdal mannen beatnagiin vázzit. Čuoiganjáhkka, viehkanbuvssat ja allajoccagat. (Eai leat eai mu skuovat ge, muhto go jo eaiggát ii oru áigumin daid ruovttoluotta, ammal dat dalle fargga leat mu?)

Fáhkkestaga ledje mus allajoccat skuovat. In máhte gal daiguin vázzit, muhto láven coggalit daid muhtomin ja hirbmadit dahkaluddat ja gában doallat.

Rutiinnat gaskkalduhttojuvvon

In leat šaddan lášmmohallat, muhto lean gal fitnan oarjjábealde. Doppe gávdnen dán guokte sápmelačča!

Jus mu rutiinnat gaskkalduhttojuvvojit de mannet moadde beaivvi ovdal fas doaibmagoađán albma láhkai. Bearjadaga lei dábálaš beaivi, muhto de lei vahkuloahppa eará lágan go láve, nu ahte mun in leat vel ge doaibmagoahtán. Odne in veadján sihkkeltiibmii, muhto mun fitnen oba vázzimin ge 70 min. Go bohten ruoktut de áigun lovttohallat, muhto justa go ledjen viđa geardde lokten goappá ge gieđain (biceps) de čuojai telefuvdna ja mu lášmmohallan nogai dasa. Dán vahku manan lullisápmái, ja boahtte vahku ges manan sis-Finnmárkui. Ferten muitit leat čeahppi oba fitnat vázzimin/viehkamin ge go lean mátkkiid alde, go mun dieđán ahte in leat nu áŋgir lášmmohallat go in leat dáppe Lofuohtas.

Odne - sihkkelastin ja iđitborramuš

Árvit geas odne rahpasedje čalmmit dii 06:20? Na mus, dieđusge! Smiehtastin sullii 15 sekundda, mearridin njuiket seaŋggas ja gárvodin sihkkeltiibmii. Kvártta váile čiežas deaddilin bađa sihkkelseahta ala, duolmmastin julggiid johtui ja duođas morihin go musihkka jupmagođii.

Maŋŋá sihkkeltiimma lei iđitborramuš lášmmohallanguovddážis. Ja de áigun rievttimielde gievrudit sealggi ja gieđaid. Muhto in mun ástan eará go veahá lovttohallat, go fertejin doamihit ruoktut vuordit interneahtta-albmá. Dál in dárbbaš šat divrasit máksit mobil-bredbånd-rehkegiid, go dál lea dáppe albma interneahtta! Viimmat.

Dán vahkuloahpa in šatta lášmmohallat, muhto soaittán gal fitnat veahá váccašeamen mánávovnnain. Buorre vahkuloahppa!

Otná lášmmohallan:

Sihkkeltiibma 45 min. 

Markløft: 30kg*8*3

Biceps: 10kg*8*2

Odne - Juolggit ja fokus

Odne lean vuot juoga oahppan, mun in nagot albma láhkái lovttohallat go leat nuorra gánddat birra buot lášmmohallanguovddážis. Go in leat okto lanjas, de doapmagoađán menddo sakka, ja in doalat fokusa nu go galggašin. Ihttin árvvoštalan mannat árrat árrat iđđedis sihkkeltiibmii vuos, ja de lovttohallat dan maŋŋá. Oaidnit lea nagodan go lihkkat ovdal 06:45.

Otná lášmmohallan:

Vázzen lášmmohallanguovddážii, sullii 10 min.

Čegŋen: 20kg*8*1, 40kg*8*3, 44kg*8*1

Utfall med vekt: +5kg*5 geardde goappá ge julggiin*3

Beinpress: 90kg*8*3

Vuoiŋŋastanbeaivi!

Odne in áiggu lášmmohallat. Áiggun dušše šlarvošit dál eahkedis: pizzagáhku ráhkadit, duddjot, bargat ovtta tiimma ja de vel tv'ii gaivát. Gaskavahkut leat mu vuoiŋŋastanbeaivvit.

Odne - sihkkelastin ja yoga

Don dieđát go leat feasttas, ja muhttin jáddada musihka, don dieđát man jitnosit olbmot hállet dalle? NIE jitnosit hállet olbmot ovdal yogatiimma dáppe... Mun orun varra hui ártegis olmmoš. Earát huikkášit ja rešket, ja mun čohkkán áibbas jaska guovdu láhtti dego unna banččadan Buddhaš. Muhto lihkkus jaskkodit go tiibma álgá, ja dát unna Buddhaš beassá vanahallat veaháš.

Otná lášmmohallan:

45 min. sihkkeltiibma

60 min. yoga

Odne - Raddi ja gieđat

Mun sávan ahte go mun deavddán 70-jagi de leat mus ge dievva oahppásat geaiguin deaivvadan juohke vuossárgga lášmmohallat ja háleštit. Sáhttit čohkkát ja muitalit iežamet áhkkubiid ja áddjubiid birra dan botta go bisuhat iežamet dearvvasin ja dearvvašlažžan. Juohke vuossárgga iđđedis lea oainnát senior-lášmmohallan lášmmohallanguovddážis, ja lea nu somá oaidnit daid moddjás vuoras ádjáid ja áhkuid. Sávan mus bistá lášmmohallanmokta vel 50 jagi! 

Odná lášmmohallan:
Vázzen lášmmohallanguovddážii, muhto go jovden dohko de ii orrun olles rumaš vel doarvái liekkas, nu ahte mun duolmmadin vel 5 minuvtta dieinna elipsemášiinnain ovdal lovttohallagohten.

Benkpress: 20kg*8*1, 25*8*3

Franskpress: +2,5kg*8*3

Skråbenk hantler: 8kg*8*3

Nedtrekk triceps: 17kg*8*2, 20*8*1

Ihttin áiggun leat albma Kárášyogalaš.

Odne - Sealgi ja gieđat

Ikte áigun rievtti mielde fitnat veahá márkanastimin iežan gáimmiin. Muhto go tiibma lei 23:00, de ledjen jo nu váiban ahte ii lean go čákŋat gokčasa vuollái. Ja odne rahpasedje čalmmit jo beal gávcci áiggi, in lean in tiimma ge bidjan čuodjat. Na, de ii lean go boradit, jugistit teaja ja čievččastit viehkanskuovaid juolgái ja fitnat beatnagiin vázzimin beaivvádagas. Vázzen sullii tiimma odne maid, ja go gergen vázzimis de fitnen ruvddiid lovttohallamin. Odne hárjehallen sealggi ja gieđaid. Lean rahčan veahá teknihkain go eatnamis galggan loktet/markløft (mo mun galggan dan «markløfta» vuohkkasepmosit dadjat sámegillii?), muhto odne orui hui bures meinnestuvvamin.

Eatnamis loktet/markløft: 20kg*8*1 (teknihkkahárjehallan), 30kg*8*3, 40kg*8*1

Biceps curl: 10kg*8*3, 12kg*4*1

Nedtrekk: 25kg*8*1, 30kg*8*2

Suhkan/sittende roing: 25kg*8*3

Gánnáha hárjehallat árrat sotnabeai' iđidiid, dalle bálle áibbas ráfis leat lášmohallanguovddážis. Luksus.

Ruoná eartamálli

In lean gal áigun deike čállit borramuša birra, muhto jo dál, bloggema nuppi beaivvi ferten čállit maid odne lean borran. Mun oainnát lean borran dan muttos njálgga ruoná máli.

Dárbbašat:

1 lávkkáža

2 vilgeslávkefatnasa

oregáno (nu ollu go ieš hálidat)

5-6 dl liema

sullii 350 grámma galmmihuvvon ruoná earttaid

Cába lávkkáža bihcabahca bihtážiidda. Steike lávkki vuojas dahje oljjus, mus gal lei albma gusavuodja. Juoge vilgeslávkefatnasiid guovtti oassái, ja bálkes vilgeslávkebihtáid ja oregáno kásterollii. Steikes vel veahá, dassá lávki dipmá. Leike liema ja galmmihuvvon earttaid kásterollii. Divtte duoldat sullii 5 minuvtta. Molle máli/earttaid gievkkanmášiinnain dahje “stavmiksáriin”. Botkal sálttiid mállái. Deh, dál ii leat go gazzagoahtit ruoná máli!

Ja go jo dát blogga rievtti mielde lea lášmmohallama birra, de sáhtán dieđusge namuhit ahte odne iđđedis fitnen beatnagiin vázzimin. Deaddilin tiimma johtui go vázzilin dás ruovttus, ja go bohten ruoktut ja lávkejin uksalasá badjel de ledje golihan justa 60 minuvtta.

Árrat!

Gánnáhii gusto bidjat dán bloggii nama Supersamenieida! Odne lean lihkkan ovdal dii 08:00, dál gáskkestan guokte garraláibevajahasa, jugistan ovtta ruksesviidnaglása ebelsinmáihlli, ja dieđusge ovtta kohpa káfe ovdal manan olggos beatnagiin. Ikte lei nu fiinna dálki, ja odne lea vel buoret! Nu ahte odne ii dárbbaš ii suohkkobuvssaid ge coggat, giđđa! 

Govviduvvon ikte, iežan favorihttabáikkis dáppe mearragáttis.

Odne - Juolggit

Álggus liekkadin sullii 7 minuvtta, ii mus lean nu leaktu odne. Mus ii oainnát doaibman dat tiima mii mihttida man johttilit váibmu coahkká, nu ahte mun čohkkájin gal sihkkela alde ja dulbmon sivvadit dan botta go viggen divvut tiimma.

Čekŋen: Álggus liekkadin veahá liigedeattuid haga *8*2, ja de lovttohallagohten: 40kg*8*3
Utfall med vekt: Dás mun geavahan dan unnit stakku mas lea deaddu, odne lei +5kg*5*3 (Go čuožžu 5 dás, de lea 5 geardde goappá ge julggiin)
Beinpress: 80kg*8*1, 90kg*8*2

Odne lei nu lihkku ahte dat beinpressmášiidna lea geavahusas justa dalle go mun áigun dan geavahit, nu ahte fertejin velledit veahá čoavjji hárjehallat. Dan in šatta nu dávjá, nu ahte dat han gal lei beare buorre.

Lean hui duhtavaš odná lášmmohallamiin. Ihttin áiggun beatnagiin vázzit veahá guhkebuš máŧkki, nu ahte ihttin gal ii dáidde šaddat eará lášmmohallan.

Ođđa blogga

Lean mearridan čálligoahtit dán bloggii mo lášmmohalan, eanaš iežan dihte, vai bisuhan movtta ja vai sáhtán áiggi mielde oaidnit ovdáneami (dahje jus nu funet manaš ahte endorii manná, de sáhtán varra das ge oahppat juoga).

Dál lea jurdda ahte galggan golbmii vahkus gievrudit iežan, ja guktii vahkus sávrudit iežan. Lean leamaš veahá láiki dainna sávrudemiin, go mu mielas lea suohttasat ruvddiid lovttohallat go viehkat. Muhto mun áiggun goitge geahččalit dál.

Gievrudeapmi*1: Dása in leat vel bidjan man galle kg mus galget go lovttohalan, muhto dá aŋkke lea mu prográmma.

1) Raddi ja gieđat
Benkpress
Franskpress
Skråbenk hantler
Nedtrekk triceps

2) Juolggit
Čekŋen/Knebøy
Utfall
Beinpress

3) Sealgi ja gieđat
Markløft
Biceps curl
Nedtrekk
Suhkan/Sittende roing

1. In vel dieđe mo dáid sániid galggan dadjat sámegillii, nu ahte ferten vuos beare čállit dárogillii dassá oahpan/hutkan daid rivttes sámegielsániid.